नेपालगन्ज श्रावण १०- राजमार्ग छेउमा होटल सञ्चालन गर्दै आएका एक दम्पतीको हत्या भएको छ । कोहलपुर नगरपालिका-१४ पार्वतीपुर नजिकैको ओडारपुरमा होटल चलाउँदै आएका २५ वर्षीय कृष्णकुमार गडरिया र उनकी २३ वर्षीया पत्नी अञ्जलीको मंगलबार मध्यराति हत्या भएको प्रहरीले जनाएको छ ।
नेपालगन्ज कोहलपुरको व्यस्त राजमार्गको छेउमै होटल व्यवसाय गर्दै आएका दम्पतीको हत्या कसले र किन गर्यो भन्नेबारे अनुसन्धान भैरहेको घटनास्थलमा पुगेका जिल्ला प्रहरी कार्यालय बाँकेका प्रहरी उपरीक्षक श्यामकृष्ण अधिकारीले बताए । गडेरियाका बुबा-आमा तीर्थ गएको मौका छोपी हत्या गरिएको हुन सक्ने प्रहरीले जनाएको छ । हत्या गरिएका कृष्णकुमारका दाजु-भाउजु माथिल्लो तलामा सुतेकाले घटना भएको थाहा नपाएको बताएका छन् । प्रहरीले दुवै जनाको शव पोस्टमार्टमका लागि भेरी अस्पतालमा पठाएको छ ।
Ekantipur
