१५ फागुन, काठमाडौं । सरकारले पर्यटनमन्त्री रविन्द्र अधिकारीको निधनमा भोलि राष्ट्रिय शोकको घोषणा गरेको छ ।
मन्त्रिपरिषद्को आकस्मिक बेठकले मन्त्री अधिकारीको निधनको शोकमा भोलि राष्ट्रिय शोक मनाउने घोषणा गरेको हो । भोलि देशभर र विदेशस्थित कूटनीतिक नियोगहरुमा सार्वजनिक विदा दिइनेछ भने आधा झण्डा झुकाइनेछ ।
हाल सेनाको एमआई १७ र अर्को हेलिकोप्टर ताप्लेजुङको आकाशमा छ । ‘हेलिकोप्टर अहिलेसम्म ल्याण्ड हुन सकेको छैन । यद्यपि, डोरीको सहायताले सेनाको टोलीले ४ जनाको शव निकालिएको छ’, प्रवक्ता ढकालले भने, ‘हाल ती शवलाई ताप्लेजुङको सुकेटार विमानस्थलमा राखिएको छ ।’
थप ३ जनाको शवलाई मौसममा आएका खराबीका कारण निकाल्न सकिएको छैन । ढकालका अनुसार रात परिसकेकाले पनि उद्दारमा कठिनाइ भएको छ । हाल एयर डाइनेष्टी र सिम्रिक एयरको एक/एक वटा हेलिकोप्टर पनि त्यहीँ छ ।
