बीरगंज २७ फागुन ।
पर्सामा एक युवक र दुई किशोरीले सामुहिक रुपमा विष सेवन गर्दा एक जनाको ज्यान गएको छ भने दुई जनाको अवस्था गम्भिर रहेको छ । विष सेवनबाट जिराभवानी गाउपालिका वडा नं ४ सढी निवासी राजू राउत थारुको १७ बर्षिय छोरी संगिता कुमारी थारुको मृत्यु भएको इलाका प्रहरी कार्यालय पटेर्वा सुगौलीका प्रहरी निरीक्षक आशिष अधिकारीले बताउनु भयो ।
बिष सेवन गरेकी संगितालाइ भारतिय बजारमा रहेका डा अनिल कुमारको क्लिनिकमा उपचार क्रममा मृत्यु भएको प्रनि अधिकारीले बताउनु भयो । संगिताको शव पोस्टमार्टमका लागि नारायणी उपक्षेत्रीय अस्पताल वीरगन्जमा पठाइएको प्रहरीले जनाएको छ । विष सेवनबाट गम्भिर अवस्थामा पुगेका जिराभवानी गाउँपालिका २ सेढवा निवासी सुरेश दासका १९ बर्षिय छोरा संजय दास थारु र वडा नं ४ निवासी राजु राउतकी १३ बर्षिय छोरी मंजिता कुमारीको भारतको इनर्वामा नै उपचार भइरहेको प्रहरीले जनाएको छ । गए राती ७ बजे सेढवाबाट विवाहका लागि केटी भगाउन सिढी पुगेका पाच जनाको केटा समूह मध्य संजय दास थारुले संगिता र मंजितालाई मोटरसाइकलमा राखी भागेका थिए । भाग्ने क्रममा अन्य चार जना यूवाहरुलाई स्थानियले पक्राउ गरी इलाका प्रहरी कार्यालय पटेर्वा सुगौलीका प्रहरी निरीक्षक आशिष अधिकारीलाई बुझाएका थिए । पक्राउ पर्नेमा सेढवाका १५ बर्षिय राज राम थारु, १४ बर्षिय मोहन दास थारु वडा नं ५ सखुवनियाका १५ बर्षिय आकाश चौधरी र अर्का एक यूवा रहेको जनाईएको छ । राती करिब साढे ११ बजे संजय दास थारुले भगाएर ल्याएका युवती सहित दासले समेत सामूहिक बिष सेवन गरी घरमा आएका थिए । किशोरीलाई घरमा छोडेर संजय फरार भएको र राति नै विष सेवन गरेका किशोरीलाई परिवारको जिम्मा लगाउने क्रममा विष सेवन गरेको खुलेपछि उपचारका लागि भारतको इनर्वा पुर्याईएको थियो । उपचारको क्रममा संगिताको आज मृत्यु भएको र १३ बर्षिय मंजिता र १९ बर्षिय संजयको अवस्था गम्भिर रहेको प्रहरीले जनाएको छ । संजयले संगितासँग प्रेम गरेको र अभिभावकले प्रेम विवाह स्वीकार नगर्ने भएपछि किशोर किशोरीले सामुहिक रुपमा विष सेवन गरेको हुन सक्ने प्रहरीले आशंका गरेको छ ।+
