असार १३- रौतहट — रौतहटमा बिहीबार क्वारेन्टाइन बाहिरका ३ जनामा कोरोना संक्रमण पुष्टि भएको छ । पुष्टि भएका ३८ संक्रमितमध्ये तीन जना टाढा कतै गएका थिएनन् । उनीहरूमा कसरी संक्रमण फैलियो भन्ने प्रशासनले खोजी गरिरहेको छ ।
गौर नगरपालिका–५ का २ र ईशनाथ नगरपालिका–३ का एक पुरुषमा कोरोना पुष्टि भएको हो । संक्रमित ३० वर्षीय बोधिमाई नगरपालिकास्थित बंकुल बजारमा पसल थापेर बस्थे । भारतको मोतिहारी कोरहिया घर भएका उनी गौर–५ स्थित ससुरालीमा बस्दै आएका थिए । गौरका अर्का संक्रमित ईशानाथ–२ घर भई गौर–५ बस्ने १७ वर्षीय युवक हुन् । काठमाडौं जाने क्रममा पीसीआर जाँच गराउँदा उनमा संक्रमण पुष्टि भएको हो । तेस्रो संक्रमित ईशनाथ–३ का २५ वर्षीय पुरुष हुन् । उनी वडाध्यक्षका सवारी चालक हुन् ।
संक्रमितलाई गौरीशंकर यादव क्याम्पसमा रहेको आइसोलेसनमा राखिएको छ । उनीहरूको कन्ट्याक्ट ट्रेसिङ सुरु गरिएको प्रमुख जिल्ला अधिकारी वासुदेव घिमिरेले बताए । ‘अहिलेसम्म क्वारेन्टाइन बसेकामा मात्र संक्रमण देखिएको थियो । अब बाहिर पनि देखियो,’ उनले भने । अहिले पनि जिल्लाभर ८ सय ३० जना क्वारेन्टाइनमा छन् ।
रौतहटमा शुक्रबारसम्म संक्रमितको संख्या १ हजार २ सय ९२ पुगेको छ । त्यस्तै संक्रमण पुष्टि भएकामध्ये ३ सय २४ जना निको भएका छन् ।
onlinekhabar
