वीरगञ्ज, ४ जेठ । मधेश प्रदेशको एक मात्र महानगर वीरगञ्ज महानगरपालिकामा पाँच दलीय गठबन्धनको तर्फबाट जनता समाजवादी पार्टी नेपालको मेयरका साझा उम्मेदवार राजेशमान सिंहले निकटतम प्रतिद्वन्द्वी एमालेका विजयकुमार सरावगीसँगको मतान्तरलाई फराकिलो पार्दै गएका छन् ।
बुधबार बिहान ७ बजेसम्म महानगरपालिकाको वडा नम्बर १, २, ३, ४, ५, ६, २७, २८, २९, ३० को २१ हजार ८ सय ८७ वटा मतगणना गर्दा जसपाका राजेशमान सिंहले १० हजार ९ सय ९४ मत ल्याएर निकटतम प्रतिष्पर्धी एमालेका विजयकुमार सरावगीलाई ५ हजार ८ सय ८६ मतले पछाडि पारेका छन् ।
सरावगीले हालसम्म ५ हजार १ सय ११ मत मात्रै प्राप्त गर्न सकेका छन् । निर्वाचनको केही महिना अगाडी मात्रै जसपा त्यागेर एमाले प्रवेश गरेका वीरगञ्जको निवर्तमान मेयरसमेत रहेका सरावगीलाई गठबन्धनका सिंहलाई भेटाउनै गाह्रो भएको छ ।
तेस्रो प्रतिष्पर्धी राष्ट्रिय प्रजातन्त्र पार्टीका गिरिश गिरीलाई जमानत जोगाउन हम्मेहम्मे परेको छ । उनले हालसम्म ४ सय २२ मत मात्र प्राप्त गर्न सकेका छन् ।
महानगरपालिकामा हालसम्म ६ वटा वडाको नतिजा सार्वजनिक भएको छ । जसमध्ये जसपाले तिन; वडा नम्बर १, ३० र ३२, नेपाली कांग्रेसले २; वडा नम्बर २ र ४ र नेकपा एमालेले एउटा वडा नम्बर ३१ मा जित हासिल गरेको छ ।
हाल वडा नम्बर ३, ५, ६, २७, २८ र २९ को मतगणना जारी रहेको वीरगञ्जका लागि प्रमुख निर्वाचन अधिकृत धर्मराज पौडेलले जानकारी दिए ।
