वीरगञ्ज, चैत्र २० – वीरगञ्जबाट दुईजनाको थ्रोट स्वाब परिक्षणकोलागि काठमाण्डौ पठाइएको छ । कोरोना भाइरस (कोभिड १९) संक्रमणको लक्षणसँग मिल्दो जुल्दो लक्षण युवकमा देखिएपछि स्वाब परीक्षणका लागि काठमाडौं पठाइएको हो ।
कोरोना संक्रमणको आशंकामा पर्साको ठोरी गाउँपालिका–२ बाट वीरगञ्ज ल्याइएका युवक र उनको भाइको ‘थ्रोट स्वाब’ संकलन गरी परीक्षणका लागि काठमाडौं पठाइएको नारायणी उपक्षेत्रीय अस्पताल वीरगञ्जका मेडिकल सुपरिटेण्डेन्ट डा. मदन उपाध्यायले जानकारी दिनु भयो । ।
उनीसँगै आएका नातामा भाई पर्ने व्यक्तिको पनि नमुना संकलन गरी जाँचका लागि पठाइएको छ । बुधबार नै स्वाब जाँचका लागि एम्बुलेसमा शुक्रराज ट्रपिकल तथा सरुवा रोग अस्पताल टेकुमा पठाइएको डा . उपाध्यायले जानकारी दिनु भयो ।
कोरोना भाइरस संक्रमणको आशंका भएपनछ उनलाई ठोरी गाउँपालिकाको टिपरमा राखेर नारायणी अस्पतालमा पठाइएको थियो । चैत १८ गते राति अस्पताल आइपुगेका उनीहरुलाई प्रारम्भिक जाँचपछि आईसोलेसनमा राखिएको छ ।
नारायणी अस्पतालमा हाल ५ बेडेको आइसोलेसन छ भने थप २० वटा बनाईंदैछ । अस्पतालले दुई साता अघि पनि एक जनाको नमुना परीक्षणका लागि टेकु पठाएको थियो । भारतबाट आएका ती व्यक्तिको रिपोर्ट नेगेटिभ आएको थियो ।
